Samsung Galaxy S25 FE modelinin yaddaş və rəng seçimləri sızdırıldı

Samsung Galaxy S25 FE modelinin təqdimatına çox az qalıb və artıq sızıntılar bir-birinin ardınca gəlməyə başlayıb. Əgər Galaxy S24 FE modelinin ötənilki təqdimat tarixini nəzərə alsaq, Galaxy S25 FE-nin sentyabr ayında təqdim ediləcəyi gözlənilir. Artıq bu modelin ümumi dizaynı və əsas texniki göstəriciləri haqda məlumatlar məlumdur.

Son sızıntıya əsasən, cihaz iki yaddaş seçimi ilə gələcək: 8GB/128GB və 8GB/256GB. Bu seçimlərin bir qədər məyusedici olduğunu qeyd etmək lazımdır, çünki bu qiymət seqmentindəki digər istehsalçılar əsas yaddaş olaraq 256GB təklif edirlər.

Rəng seçimlərinə gəlincə, sızan məlumatlara əsasən Navy (tünd göy), Icy Blue (buz mavisi), Jet Black (tünd qara) və White (ağ) rəng variantları təqdim olunacaq. Bu rənglərə Galaxy S seriyasının mövcud modellərində artıq rast gəlinib. Bu isə o deməkdir ki, rənglərdə sürpriz yoxdur, lakin Galaxy S24 FE modelində bu rənglərdən heç biri mövcud deyil.

Galaxy S25 FE modelinin daha geniş yaddaş seçimi və fərqli rəng palitrası təklif edib-etməyəcəyi isə hələ də məlum deyil.